Tradizzjoni Maltija popolari iktar minn qatt qabel hi l-quċċija. Din issir dakinhar li t-tarbija tagħlaq is-sena biex tbassar il-karriera futura tagħha. Minkejja li mhux neċessarjament tfisser li t-tarbija se tagħmel ix-xogħol marbut mal-oġġett li tkun qabdet, hi tradizzjoni ħelwa biex tiġi ċelebrata mal-bqija tal-familja, u tagħmel l-ewwel festin tat-tarbija differenti minn dawk kollha li jiġu ċelebrati wara.
L-oġġetti jvarjaw skont li jixtiequ jpoġġu l-membri tal-familja u llum il-ġurnata saru jitpoġġew oġġetti ta’ karrieri iktar moderni wkoll, mhux biss oġġetti marbutin ma’ snajja’. Minbarra dan, l-oġġetti jistgħu jvarjaw skont xi jkollu dak li jkun għandu d-dar. Għall-karriera fil-ħjata measuring tape tajjeb imma minċott ħajt tajjeb ukoll. Hemm min jestendi l-lista tal-oġġetti lill-qraba u jistedinhom iġibu oġġett marbut max-xogħol tagħhom jew li jfisser għalihom u b’hekk jinvolvihom iktar fiċ-ċelebrazzonjoni.
Hemm min saħansitra jeħodha oltrè u jagħmel quċċija oħra biex jaraw it-tarbija ma’ liema tim tal-futbol se tkun qed iżżomm ’il quddiem billi jpoġġulha l-flokkijiet tat-timijiet favoriti tagħhom. Din naturalment issir jekk ikun hemm membri fil-familja li jżommu ma’ timijiet differenti b’ċertu akkaniment.
Il-quċċija normalment titħalla l-aħħar ħaġa tal-festin qabel jew wara li jinqasam il-kejk. Jekk tixtieq iżżommha hekk, importanti li tikkalkula ftit il-ħin tal-festin ħalli ma tagħmilhiex meta t-tarbija tkun wisq għajjiena biċ-ċans li tispiċċa ma tagħmel xejn. F’dak il-każ ma tkunx idea ħażina li tibda biha wara li jaslu l-mistednin kollha. Tevita li jkollok it-tarbija f’burdata ħażina meta suppost hu l-iktar mument mistenni tal-festin. Ara xi ideat oħra għall-festin, hawn.
LISTA TA’ OĠĠETTI, U L-KARRIERI LI JIRRAPPREŻENTAW
Il-lista tradizzjonali 
Bajda – risq jew fertilità
Flus – rikkezza (fl-antik għat-tifla kienet tfisser li se tidħol fi żwieġ tajjeb)
Kuruna tar-rużarju – vokazzjoni reliġjuża
Martell – xogħol fis-snajja’ bħal mastrudaxxa jew skarpan
Measuring tape – xogħol fil-ħjata
Ħġieġa tad-deni – xogħol marbut ma’ saħħa bħal tabib, ners
Għodda (eż. turnavit/ spanner) – xogħol tal-idejn bħal mekkanik, electrician, plumber, bennej
Frotta jew ħaxixa – xogħol tal-biedja
Mgħarfa tal-għuda – xogħol fil-kċina
Pinna – xogħol marbut mal-qorti bħal nutara jew avukat
Pettnè – barbier jew hairdresser
Ktieb – persuna ta’ skola, għalliema jew kittieba
Naturalment il-lista għaż-żminijiet tal-lum twessgħet, speċjalment għall-bniet, li qabel kellhom oġġetti pjuttost marbuta ma’ xogħol tad-dar.
Il-lista bil-karrieri tal-lum
Ballun – xogħol fl-isports
Strument mużikali – xogħol fil-mużika
Rutella/ kumpass – xogħol fl-inġinerija, arkitettura
Calculator – xogħol fl-ekonomija bħal bankier jew accounts
Mouse tal-kompjuter – xogħol fl-IT
Toothbrush – xogħol fid-dentistrija
Make-up – xogħol fil-moda jew sbuħija
Żarbun tal-ballet/ mikrofonu – xogħol fuq il-palk
Boxxla – xogħol fl-ivjaġġar bil-baħar bħal kaptana
Ajruplan – xogħol fl-ivjaġġar bl-ajru bħal bdota jew air steward
Camera – xogħol fl-awdjoviżiv bħal fotografu jew vidjografu
Manetti – xogħol fis-sigurtà bħal pulizija jew suldat
Pinzell – xogħol fl-arti u disinn
