Għal poplu li jgħix f’pajjiż sħun, vera nħobbu nkebbu lit-tfal tagħna f’balla ħwejjeġ. Imma x’suppost inlibbsuhom lit-trabi? Qabla tkellmet ma’ Buzymummy u tatna ftit pariri dwar kif se nindunaw humiex imlibbsin iżżejjed
Wieħed għandu jżomm f’rasu li t-tarbija se tibki jekk hi skomda u hemm tendenza li iktar tibki meta tħoss is-sħana milli l-bard. Ta’ min wieħed joqgħod attent ukoll li l-konsegwenzi ta’ overheating huma ħafna agħar minn dawk ta’ meta tħalli lit-tarbija tħoss ftit bard, speċjalment fis-sajf.
Buzymummy tkellmet ma’ qabla (midwife) dwar dan u qaltilna: “Jekk tarbija tħoss is-sħana tinduna għax ikollha wara għonqha mxarrab bl-għaraq u jitilgħulha bħal dwawar ħomor żgħar anke f’wiċċha. Ħafna sħana tista’ tkun kawża ta’ cot death. It-tarbija tista’ tiġi dehydrated u jista’ anki jinżlilha z-zokkor.” Żiedet tgħid li hu minnu li t-tarbija rridu nlibbsuha saff ħwejjeġ iktar milli lebsin aħna imma bis-saff żejjed fir-realtà “nkunu qed nirreferu għal għata li t-tarbija jkollha fuqha”.
Jekk it-tarbija diġà tkun attiva jew tiċċaqlaq ħafna, l-għata ibdilha ma’ saff ieħor ta’ ħwejjeġ bħal xi flokk ta’ taħt.
Meta t-tarbija tħoss il-bard ikollha jdejha kesħin ħafna u jekk tippruvalha t-temperatura tkun baxxa
Dwar l-iskufja (hat) issostni li din għandha titlibbes dejjem almenu sal-ewwel xahar, imma skont l-ajru u kemm hi sħana. “Jekk sħana tlibbes xejn imma jekk għandek l-AC, iva libbes. Jekk ix-xitwa ibqa’ libbes kull meta toħroġ.”
It-trabi jitilfu s-sħana l-aktar minn rashom, għalhekk importanti li f’temp sħun din tinżamm mikxufa, ħalli t-tarbija ma tisħonx iżżejjed.
Aħjar tlibbes lit-tarbija ħwejjeġ li tista’ tnaqqsilha saff minnhom milli xi ħaġa waħda biss li kapaċi tkun ħoxna wisq għall-post li tkun fih.
Il-qabla kompliet tgħid li “meta t-tarbija tħoss il-bard ikollha jdejha kesħin ħafna u jekk tippruvalha t-temperatura tkun baxxa”.
Il-probabbiltà hi li t-tarbija meta tħoss il-bard tibda tibki. L-ewwel istint hu li terfagħha u forsi titmagħha. Allura din tikkalma għax int tipprovdilha s-sħana waqt li qed iżżommha fuqek u terġa’ torqod.
Jekk kif tmedda, tqumlek wara ftit, għax terġa’ tkun kesħet, hawnhekk fejn ta’ min tiċċekkja jekk it-tarbija hiex tibki għax qed tħoss il-bard.
LINJI GWIDA TA’ LBIES
Dejjem għandek tuża s-sens komun u żżid jew tnaqqas il-ħwejjeġ skont it-temperatura fejn qed tkun. Aħjar tlibbes lit-tarbija ħwejjeġ li tista’ tnaqqsilha saff minnhom milli xi ħaġa waħda biss li kapaċi tkun ħoxna wisq għall-post li tkun fih. Ta’ min dejjem iġġorr miegħek xall tal-qoton irqiq jew qlejba kbira ħalli tużahom meta jkollok bżonn. Importanti li l-ħwejjeġ ikunu kemm jista’ jkun 100% tal-qoton (cotton).
Żomm f’rasek ukoll li t-tarbija jista’ jkun tħoss iktar jew inqas sħana minnek. Għalhekk trid tosserva lilha u mhux tiddeċiedi biss fuq x’inti liebsa inti biss.
It-tarbija fl-isptar sajf u xitwa
Tarbija ta’ ftit sigħat fl-Isptar Mater Dei. It-tarbija tlibbset babygrow bil-kmiem li jgħattu kompletament l-idejn. Minn taħt liebsa flokk ta’ taħt b’komma twila u par kalzetti. Tgeżvret f’xugaman flok f’xall
- Flokk ta’ taħt komma twila
- Kalzetti
- Mittens
- Babygrow
- Skufja
- Xall/ xugaman biex tgħattiha
It-tendenza hi l-mittens ma jżommuhomx. Kalzetti twal f’idejhom huma iktar effettivi.
Inkella, iktar komdi minn hekk, huma babygrows li jkollhom biċċa żejda mal-komma li biha tkun tista’ tgħattilhom idejhom kompletament. Il-kmiem ta’ dawn il-babygrows jintwew u għalhekk meta jkollok bżonn tista’ tikxfilhom idejhom.
L-ewwel xahar tat-tarbija
Tarbija ġewwa fi flokk ta’ taħt nofs komma u kutra ħafifa
Għal ġewwa:
- Flokk ta’ taħt nofs komma (meta żżid is-sħana neħħih)
- Kalzetti
- Romper jew flok u qalziet ħafif/ shorts
- Mittens*
- Għattiha meta tkun rieqda
Jekk tuża l-arja kundizzjonata, libbisha skufja. *Il-mittens jintużaw għal żewġ raġunijiet: biex iżżomm idejn it-tarbija sħan u biex din ma tigrifx lilha nnifisha. Jekk fid-dar għandek is-sħana tibqax tlibbishomlha. Biex ma tingirifx uża nail clipper, inkella aħjar minn hekk, aqtagħhomlha b’ħalqek kif issuġġeriet il-qabla. B’dan il-metodu jkollok kontroll komplet ta’ fejn qed taqta’ sakemm difrejhom ikunu inqas diffiċli biex taqtagħhom.
Għal barra:
Importanti tevita x-xemx u ġġorr miegħek xi tip ta’ beritta jew kappell għal li jista’ jkun. Jekk tagħmel babywearing, żommha fi flokk ta’ taħt u qalziet ħafif, u ġorr flokk ieħor żejjed biex meta tneħħiha minn miegħek tkun tista’ tlibbisha saff ieħor, speċjalment jekk tkun f’post bl-arja kundizzjonata. Meta tkun is-sħana qalila tas-sajf, flokk ta’ taħt ċingi jkun biżżejjed. Jekk tħoss li saqajha kesħu libbisha par kalzetti (dejjem jekk iżżommhom).
Tarbija mlibbsa bi flokk nofs komma, shorts u par kalzetti. Mhix liebsa kappell għax ix-xemx kienet se taqbad tinżel
Għal billejl:
Jekk qed tixgħel l-AC, it-tarbija tista’ tlibbisha flokk ta’ taħt ħafif komma twila u traqqadha fi sleeping bag ħafifa jew minflok f’babygrow komma twila biss. Jekk tħossilha saqajha kesħin libbisha par kalzetti. Jekk il-kalzetti ma żżommhomx tista’ tlibbisha qalziet bil-qalza magħluqa minn taħt.
Jekk il-kamra hi sħuna ġa tista’ traqqadha fi flokk ta’ taħt tan-nofs komma. Libbes qalziet ħafif u par kalzetti jew qalziet li jgħatti s-sieq skont il-bżonn. Żomm f’moħħok kif torqod int u ara jekk it-tarbija hiex qed tqum imxarrba għasra jew tinħassx kiesħa, u naqqas jew żied skont il-bżonn.
Lożor fuqhom mhumiex rakkomandati għax jistgħu jgħattu wiċċhom bihom. Il-lożor ta’ taħt idealment ikunu dejjem tal-qoton ħabba l-allerġiji. Jekk se tgħattiha b’liżar, importanti li tqiegħed lit-tarbija fin-naħa t’isfel tas-sodda u l-liżar tqabbdu sew taħt is-saqqu.
Tarbija ta’ ġimagħtejn imlibbsa babygrow u flokk ta’ taħt taċ-ċingi minn taħt għal billejl
